Una vita ind'una ghjurnata di ... (7)

U lavu di Crena

À i studienti di lingua corsa di U filu d'amparera, u nosciu prufessore ci hà propostu una rundighjata finu à u lavu di crena.

Pà una bella ghjurnata assulanata ci semu partuti à 5 da Aiacciu pà raghjunghjicci in Saona incù u nosciu prufessori è a so moglia. In piaghja u tempu era di veranu ma, ghjunghjendu à a croce sopra à u paese di Soccia à l'iniziu di u chjassu, ci era un vintacciu fredu fredu à ghjilassi l'arrechji è i mani. Anc'assai caminendu ci semu pussuti scaldà un pocu.

Annantu à a strada i più ghjovani sò pussuti galuppà ma di tandu in tandu sò stati abbastanza bravi à aspittà à l'anziani minanni spittinati chì trascinavanu à qualchì cintinaia di metri in daretu. Dopu à un'ora è mezza di cuddata, a l'emu fatta à ghjunghje à a distinazione di a noscia surtita.

Stu lavu di Crena hè beddu pà tutti i staghjoni. U nosciu prufessori l'avia vistu qualchì settimana fà cutratu incù a neve à l'intornu. Arimani pà noi, avia sempre u so vistitu d'inguernu, l'arba era grisgia, u lavu scuru à l'umbriccia di i so pini larici ma u sole facia annantu à l'acqua riflessioni di i cimi muntagnosi fasciati di nevi. Ci era dinù a prumessa di l'istate induva si poni vede i ninufari numarosi chì coprani u so pianu.

Vultendu ver'di i vitturi avemu vistu parte un marchjatore incù i so arnesi pà stassine una nuttata (o dui) in muntagna. Mi saria piaciuta fà cum'è eddu ma pà quissa ci vole a ghjuventù è a forma fisica..... forse in un'altra vita.

Mi tocca à ringrazià à u nosciu prufessore chì ci hà datu un ghjornu di i so vacanzi è ringraziu dinù tutti l'altri participanti chì surtiti cusì ci aiutani à rinfurzà i nosci cunnuscenzi di a lingua corsa.

---