Una vita ind'una ghjurnata di ... (10)

Dui spassighjati intornu à Carghjese

"È torna in... Carghjese, ch'eddu hè un beddu paese." Di di più ci hè sempri u soli!

A dilla franca, a meteo ùn era micca favurevule dumenica scorsa quand'è no ci semu dati appuntamentu incù u nosciu prufessore di lingua corsa pà dui spassighjati intornu à Carghjese ma u nosciu accanimentu hà pagatu è ci semu campi.

Prima u giru finu à u Puntiglione daretu à u paese di Carghjese. Tempi fà c'erani quì bandi di pecuri è capri è di sicuru a machja ùn criscia micca in ogni locu com'è avà. Emu vistu unu stazzu di pastore, chjamatu da i ziteddi di Carghjese "a casa di a strega".

Avà ci n'hè ferma pocu di stu piazzile ma si vede ch'eddu t'hà un climà particulari stu locu chì no emu trovu beddi spunti di sparagi.... di nuvembri!

Dopu, partendu da a marina di u Peru, avemu presu u chjassu bedd'insignatu versu à a torra di l'Umigna.

Dappertuttu beddi visti annant'à u mare, u celu cambiente, è a machja cù pianti sfarenti secondu ch'eddi siani à u sulanu o à l'umbriccia. À u sulanu si vedeni soprattuttu u listincu è a muredda (in stu locu propriu assulanatu avaria ancu una qualità spiziali) è altri pianti di a sicchina. À l'umbriccia inveci emu vistu unipochi di lecci è dinù a scopa.

---