Cartes postales

Una vita ind'una ghjurnata di ... (6)

Home      Altri scritti;
(Lasceti u topu annantu à a fotò pà vede u titulu.)

UN ASSAGHJU ANNANT'À U TURISIMU IN CORSICA

Tuttu hè cuminciatu incù un tuitu pustatu da @PGHIONGA: "Le Tourisme doit-il être l'alpha et l'oméga de notre développement économique ? » A seguita hè stata un cuntrastu trà Ghjuvan'Santu è eiu annant'à l'attività ecunomica è sopratuttu u turisimu è pò, pà finisce, aghju dettu ch'e puderiu scrive un assaghju annant'à a quistioni. Ghjuvan'Santu hà lanciatu a sfida, allora ecculu...


Incù una pupulazioni di 300.000 abitanti in un'isula di 8700 km2 à 180 km da u so cuntinente, i pussibilità di travagliu sò più scarci cà in altrò. Oranges bio

Ci hè l'agricultura è a pruduzzioni di ligumi ch'ùn riempieni micca a so putenziale ma, di tutta manera , quì sò sopratuttu arabi ch'è ci travaglini pà via di i difficultà fisichi di sta filiera. Unipochi d'esempii interessanti quantunque sariani Corsica Pam (olii essenziali) è u "Jardin des abeilles"(melu), tutti i dui in Òcana, oppuru Christian Lorenzoni, purchaghju di Bastèlica incù u so picculu trenu, eddi riescini tutti à lià agricultura è turisimu. Dinù ci saria l'artisgianata micca solu artistica ma di tutti i ghjorni cum'è piumbaghju, electricistu, bancalaru di parsiani à arrutulà...., u vantaghu essendu ch'è quì si tratta di mistieri ch'ùn si poni micca spustà. Ma quand'e vecu a pocu vulintà di i ghjovani assistenti di l'artisgiani mi dicu chè l'intaressu ùn ci n'hè pocu è micca da a parte da sti ghjovani. Fromages

Essendu annant'à un'isula a manufattura ùn pò esse cà d'oghjetti chjughi è/o à valore abbastanza forte. Pà disgrazia, u terrenu hè pocu accogliente pà intrapresi ghjugnendu d'altrò è chì vuleriani stallà si in Corsica criendu impieghi ma ci hè quantunque l'esempiu nustrale di Corse Composite Aéronautique. Quì u prublema puderia esse a mancanza di travagliadori furmati.

Quindici o vinti anni fà, mi n'invengu d'avè lettu dichjarazioni di puliticanti annant'à u prughjettu di stallà una cunnessioni internet rapidu quasi dapertuttu in Corsica, cusì a ghjenti avia da pudè travaglià in casa ancu in un paese di muntagna. Unipochi d'anni più tardi, ùn si pò micca dì chì a cunnessioni internet sia sufficiente è in casa, pà esempiu, aspessu ùn possu attualizà i me siti d'intaressu publicu, Corsica Bus è Corsica Access, à colpa di a cunnessione gattiva. Pà un'intrapresa, ùn saria micca pussibile travaglià cusì. Chaises longues

Ci sò dinò l'attività di custruzzioni, cumerciu è di servizii chì sò primurosi in Corsica.

U serviziu publicu ùn cria alcuna ricchezza ma si cuntenta di vive annant'à a ricchezza criata da l'altri è ci vole, in ognunu paese o rughjonu, un mutore ecunomicu.

L'ultima suluzione di stu picculu elencu saria u turisimu. A me propria sperienza hè vechja è forse hè cambiata a situazioni avà , ma quand'e vecu i risultati, pensu di nò.


Dapoi u principiu di u turisimu 40 o 50 anni fà, avemu sempre intesu a listessa dumanda: chì tipu di turisimu ne vulemu? Senza mai piglià una direzzioni dicisa. Avemu intesu dinò chì u turisimu sia un "male nicissariu". A pupulazione pare di più tullerante versu l'alloghju di nivellu bassu (campeghji, centri di vacanze, ecc...) è menu favurevule versu l'alloghju di nivellu superiori. Anni è anni, ci semu cuntintati di prupone u sole è micc'altru. Quindeci anni fà François Ollandini hà dettu chì i turisti viniani quì in Corsica, i soldi in stacca, è si ne andavani i soldi sempre in stacca chì attività adattati ùn ci erani. U risultatu di sta mancanza di dicisione u vidimu oghje incù a maiò parte di i turisti chì venini incù l'idea sola di stracquà si annant'à a rena

.

I girenti di i strutturi turistichi erani pocu prufessionali. Aghju vistu baruffi trà dui coppie di girenti d'un usteria davanti à u me gruppu di ghjappunesi, un'altra volta u pruprietariu mi hà lacata sola un mezz'ora à serve u sghjugnu à u me gruppu, ch'eddu duvia andà à circà a so amica da l'aeroporto (tassi ùn ci n'era micca, oppuru un amicu?). Un'andatura cusì dà piuttostu una gattiva rinumata à a distinazione Corsica. Ancu se l'usteria hè di famiglia nudda ci impidisce di suvità una furmazioni adattata.

plage de Mar'è sol Pà dì a verità aghju piantatu a me attività di guida pà via di a mancanza di cumudità di i càmeri d'usterii. Aviu ancu scrittu un elencu di prublemi chì vuliu invià à un'urganizazioni di sta filiera. Pà a maiò parte erani picculi prublemi : mancanza di scanceria in càmera o in bagnu, mancanza di lumi pà leghje in lettu (sola una plafuniera), prutege-stapunta in plastica (quand'è a notte era calda, calda) oppure mancanza d'una cuverta di più pà i notti freddi, acqua teppida o fredda pà a duscia, tappi mancanti, pà u sghjugnu u caffè teppidu è u buttiru quasi sdruttu. L'elencu ùn l'aghju più ma ci n'era abbastanza i lagnanzi. Altri si trattavani da a sicurezza di i clienti. C'era aspessu dinù l'accolta frischetta pà i gruppi allora ch'eddi arrecani rivinuti fora di l'alta staghjoni (aprile, maghju, ghjugnu, sittembre, ottrove), incù anc'assai unipochi d'eccezzioni.

Troppi documenti pà turisti sò scritti solu in francese, annant'à u web cumincia avà i scritti in inglese, talianu, alimanu, ecc. ma sopra locu hè quasi sempre u francese è solu u francese. U risultatu: più di 70% di i turisti ghjugnendu in Corsica sò francesi è viaghjini eddi trà a mità lugliu è a mità aostu.

Tuttu què pà spiegà cum'edda si face chì nò avemu i turisti chì nò avemu. Avemu un turisimu massicciu chì hè subitu cum'è un infernu da a pupulazioni lucali da u 10 di lugliu à u 25 d'aostu.


Pò esse troppu tardi avà ma u scopu saria di fà vene a ghjente fora di lugliu e d'aostu. Ùn hè micca a listessa clientela è edda hà bisognu d'attività, d'infurmazione prima di vene è sopra locu, d'usterii accoglienti è cunfurtèvuli, è di risturanti curretti.

Ci vuleria vede ciò chì funziona in altrò, ma ci vule attività diversi induva a meteo hè menu impurtante. Si pò pinsà à u mudellu di a Ferme auberge in Zèvacu induva i clienti sò accolti a mane pà l'agricultoru chì face a vìsita di a so splutazione, à meziornu ci hè u ripastu incù i so prodotti è dopu meziornu ci sò fotò è spiegazioni annantu à a vita in i tempi fà. Incù a so accolta persunalizata, ci hè dinù u mudellu di Bianconi Scuperta chì face scopre à picculi gruppi u patrimoniu di l'isula. A musica saria un'altra pista è ancu i sighjorni à temi: a pittura, i fiori.

escalade Tutti i manifestazioni culturali, sportivi et altri, duveriani esse annant'à internet almenu 6-8 mesi d'avanzu è annant'à un solu situ pà tutt'a Corsica, spiccatu pà rughjoni (à vede u situ scozzese: www.visitscotland.com oppuru quiddu di Südtirol: www.suedtirol.info). Ci vule à tene à mente chì s'infurmani prima di vene i clienti chì ùn venini micca pà a rena è cusì poni planificà u so sighjornu. Aghju rimarcatu, pà esempiu, ss'istate 2-3 ghjorni prima di u cuncertu da I Muvrini ùn ci era nudda annant'à u situ di u Turisimu di Purtichju. I siti storichi duveriani esse indicati sopra locu. Ben intesu, st'infurmazione annant'à u web è sopra locu, ci vule à scrive la in lingui stranieri, almenu l'inglese.

Ci hè a quistioni primurosa di a priservazioni di a natura. 15 anni fà aghju avutu u còmpitu di fà a vìsita à un màssimu d'usterii di tutt'a Corsica pà un agenza britannica è una dumanda era di sapè qualessi erani l'usterii à praticà u turisimu durabile chè l'agenza li vulia dà a pricidenza. Nimu a sapia qual'edda era! Ùn ci era cà da fighjulà u casu di Ghjirulata induva i rumenzuli s'ammansavani daretu à u paese finù à unipochi d'anni fà. Pà certi siti sensibuli (a Restonica, Palumbaghju, ecc.) forse si puderia urganizà un sistema di navetta chì i vitturi stessini luntani da u situ à priservà (à vede u situ di a Parata vicinu à Aiacciu o l'Alpi di Siusi in Italia). I pisti di furesta sariani riservati pà a legge à veiculi di l'abbienti dritti : agricultori, pruprietarii, cacciadori autorizzati, ecc.) incù un accessu libaru à pedi o à bicicletta pà tutt'ognunu. Stu sistema funziona in l'Alpi d'Italia è Austria è forse di Francia. Si pò dì chì, di stu puntu di vista, i cimici di lettu in i rifùgii di muntagna ci vula à lacà li chì cusì venini menu marchjatori(!) Pà i camping cars, ùn saria micca pussibile un sistema ubligatoriu di tituli in un campeghju o spazii specifichi pà ogni notte di u so sighjornu à pagà d'avanzu? (Forse l'Auropa hà da ricusà st'idea.) Quant'è me saria statu megliu dinù di autorizzà unipochi d'usterii annant'à u mare è micca cintinaii di residenzi secundarii chì ùn arrecanu nudda dopu à a custruzzioni.


Soprattuttu, ci vule à cambià a mintalità: a staghjoni cumincia da u mese di marzu o d'aprile è micca u 10 di lugliu.


Una cosa hè sicura: attività umani neùtri pà a natura ùn esisteni micca, in ogni casu ci vule à surveglià li. U turisimu ben urganizzatu fà cresce altri attività. U vantaghju pà quiddu chì travaglia in u turisimu hè chì, ancu travagliendu, si trova in una situazione di divertimentu (è aghju l'esperienza di tutti i mistieri di a filiera). I soldi guadagnati da i residenti corsi sò, pà a maiò parte, spesi quì in Corsica. Un batellu di cruciere paga tassi à a Camera di cumerciu è d'industria, soldi chì dopu sò spesi quì. L'agenza marittima incassa dinù pà i so servizii, i passaghjeri faceni surtiti : i traspurtatori, i caffè è altri pristatarii incassani è sti soldi sò spesi quì in Corsica.

U turisimu hè l'industria mundiali chì cresce u più è raprisenta oghji 10% di u cumerciu di sta planeta. À a Corsica li tocca à piglià ne à so parte.




S'è vò truveti sbagli in stu testu ci vole à .