Scritti d'una studienti di lingua corsa

Luntanu da quì ci hè una muntagna. Ùn hè micca alta, sta muntagna, a so altura saria intornu à 2200 metri ma t'hà a so parsunalità.

Prima, hè zuccata da i muntagni chì a circondani da dui vaddi stretti, stretti è prufondi. Longu à una di sti vaddi furmiculeghjani di notti è di ghjornu milliai di ghjenti annant'à l'autostrada o a strada o u caminu di farru ma quì, in cima, ùn si vedi nudda, ùn si senti nudda, pudariami essa solu in stu mondu aeriu.

A u punenti è versu à u nordu, vidimu un paisaghju di pianura spugliata cù i so ghjinepari è l'arba scarsa. Si pudaria essa in Scozia. Una volta, falendu pà stu fiancu à punenti, a muntagna era a meia, l'aghju spartuta sola incù una banda di vacchi.

A maraviglia si trova versu à u levanti incù una vista larga annant'à i primi muntagni di i Dolomiti. À meza altura ci hè una prima scanceria cù i paesi di Seis è Kastelruth, 800 metri più altu si trova u pasculu d'istati di a Seiseralm è daretu ci sò i muntagni spittaculari di Langkofel, Plattkofel, Sella è tant'altri... Dopu à almenu 8 visiti, avà possu dà un nomi à quasgi ugnunu di sti cimi.

Versu à u meziornu di a "me" muntagna u paisaghju cambia dinò una volta è diventa quasgi un paisaghju di a Normandia (s'è no ùn aviami micca a vista annantu à i muntagni) incù prati, vacchi, arbureti, cavaddi, paesoli induva a vita hè linda.

A me muntagna si chjama Rittnerhorn in alimanu, oppuru Corno del Renon in talianu, chì u Sudtirulu t'hà trè lingui ufficiali (incù u ladinu). Hè luntana da quì è ogni volta, partendu, li facciu u me discorsu d'addiu eppò dopu à dui o trè mesi a sò dighjà ch'e ci aghju da vultà dinò. Un pezzu di u me cori stà di sicuru annant'à i fianchi di sta muntagna.