Scritti d'una studienti di lingua corsa

"Ci voli à cunsumà!" ci diciani i puliticanti di a fine di u XXesimu seculu, ch'eddi vidiani dighjà a fiumara di soldi chì aviani da cascà ind'è l'impositi.

"Ci voli à cunsumà!" mi dicia me fiddola ch'edda avia imparatu a so lezzioni di l'epica è cunniscia dinù i me abitudini di risparmiu.

"Ci voli à custruisce!" ci diciani i'mprenditori, "chì cusì s'hà da ripiglià l'ecunumia!".

"Ci voli à rimpiazzà a manghjusca ch'ùn hè più fresca, fresca!" ci diciani i cunsiglieri di a saluta ch'eddi circavani à venda i so libri.

"Ci voli à viaghjà!". "Ci voli à suvità a moda!". "Ci voli..." "Ci voli..."

Ma ciò ch'ùn anu micca previstu i nosci guvernanti, eppuru sò pagati pà quissa, hè chì a pruduzzioni dapoi l'anni 90 si faci soprattuttu in China è in altri paesi for'di l'Auropa. Quì ùn ci fermani più cà l'attività di rivendita .... è i rumenzuli.

È i rumenzuli, quì in Corsica, chì ne femu? Ùn hè micca d'avà ch'è no sapemu ch'edd'hè pussibili u riciculu di i mulizzi è a so utilizazioni pà altri prudotti.

Da l'anni 80 in cuntinenti anu cuminciatu a cullezzione di u vetru è di a carta. Ùn valia micca a pena di circà scatuli maiò di carta in un centru cumerciali ch'eddi erani subitu tagliati è pianati. Cuntinitori pà u vetru ci n'era in ogni parcheghju cumerciali.

Quì ind'è noi, sò più di 300.000 tunnellati ogni annu ch'è no pruducemu (incù l'aiuta di i statinenti). Sò ingiru à 90% i rumenzuli à esse "intarrati" sottu à i nosci pedi: un rigalu pà i nosci bisfiddoli è quiddi chì venini dopu.

Eppuru, in ogni locu i suluzioni ci sò.

In Alimagna, aghju vistu finu à 6 rumenzulaghji in ogni casa pà fà a scelta sopra à locu. In Italia, ancu ind'i centri pedunali, aghju vistu a racolta differenziata: vetru, carta, verdura, altri pacchetti. Dopu cacciatu quissu, ùn ci ferma più tantu à intarrà.

Allora! Chì cunsumatori seti? Quiddu chì vedi solu a facilità o quiddu chì pensa à a pianeta ch'è no lasciaremu à i nosci?