Scritti d'una studienti di lingua corsa

A sittimana scorsa mi sò fatta un piacè tamantu, ne aviu a brama da un beddu pezzu dighjà. Aghju participatu à un stasgiu pà amparà à fà i fattoghji di ghjuncu marittimu.

I fattoghji di ghjuncu ghjuvavani sempre finu à l'anni 70 pà fà sculà u latti è pà furmà sia u casgiu, sia u brocciu. Oghji, pà disgrazia, so stati rimpiazzati da cistini di plasticu.

Issi stasgi d'intricciatura sò urganizati dappertuttu in Corsica da Natalina Figarella. Si pò truvà tutti i rinsegnamenti annant'à u so situ : natalina.odexpo.com

Semu stati ricevuti ind'u casgiaghju U Diceppu in Appiettu, vicinu à Aiacciu, induva Cecile ci ha datu un'accolta più cà amichevuli. Erami una dicina (solu donni) stallati annantu à a tarrazza à u soli è di fronti à u monti Gozzi.

Emu fattu i primi passi pà capì un pocu u sapè fà di 'ssa tradizioni. Natalina ci hà parlatu di a manera di coglie u ghjuncu in bor'di mari o in ripa di stagnu è d'appruntallu. Dopu emu vistu chì ci vulia sceglia un stigliu di ghjuncu, longu o cortu, spessu o finu, sicondu u locu di a forma, è emu amparatu dinù i sfarenti gesti d'intricciatura pà pruduce 'ssi picculi cistini chì sò cusì beddi.

Natalina è Sylvie anu avutu una pazienza infinita di santi à spiegacci una volta, o ancù parechji, i nosci sbagli oppuru a manera di cuntinuà u nosciu travagliu.

Fatta fine tutt'ognuna si hè trova cù a so fattoghja fatta da i so mani, dighjà un mutivu di fiertà, è semu partuti cù i nosci fattoghji impiuti da u brocciu di u ghjornu.

Ringraziamenti tremendi a Natalina, di sicuru, ma ancu à Cecile, Sylvie è a tutti i studienti pà un beddu mumentu passatu insemi.