Scritti d'una studienti di lingua corsa

À miziornu mi hà purtatu u mazzulu di mimusà è a sera hè ghjuntu cù un mazzulu di scopa secca. Ci hè almenu dui maneri di cunsiderà 'ssi maghjini.

Prima vecu a divuzioni di quiddu chì piglia un mumentu di u so tempu, videndu qualcosa annant'à a so strada. Si dici chì faria piacè à un tali, s'arreghji pà taglià ni dui rami è dopu u li porta stu mazzulu tinendu lu com'è un ghjovanu arrichendu un mazzulu di rosuli à a so innamurata.

In la fotò a storia sana ùn si vedi micca ma i so rigali sò sempri di staghjoni è venini sempri da a natura, mai da u cumerciu: una stacca piena di castagni, una bracciata di legnu di castagnu, una manata di funzi, meli bastardi pà a cunfittura o, cum'è in 'ssu mumentu, spàragi salvatichi.

A mimusà, a sapemu, riscalda u cori : cù u so culori vivu, u so prufumu prununziatu, hè unu di i primi cenni di u veranu, di a prumessa di u caldu ch'hà da ghjunghja è u binistà dinò.

Pà certi u piacè di riceva un mazzulu di scopa morta pò essa più oscuru. Inveci tutti quiddi chì scaldani a casa cù u sciaminè capìscini subbitu subbitu a gioia à a vista di 'ssi rami spinti. Cù una manata di scopa secca ùn si pò mancà d'accende u focu senza strazià si.

A siconda manera d'analizà sti dui fotò saria più filusofica. Fora di quiddi chì stani in una rilazioni cù l'anima suredda da a preistoria, a sapemu tutti chì li storii d'amori t'ani un iniziu è una fini. Cumenciani cù i lumi è i culori spampillulenti à fà luccicà l'ochji. Ci hè u tempu di a sbucciata suvitatu da l'epuca di u spannamentu è a gioia. Pà disgrazia, a natura hè fatta cusì chì u tempu di u spannamentu ùn pò durà pà u sempri è beddu pristu vinarà l'ultimu capitulu di a storia quand'è tuttu si trasmuta in cinnara è polvara: i fiori, l'alburi, i storii d'amori è a ghjenti...