Scritti d'una studienti di lingua corsa

L'affissu hè tipicu di un stilu di prupaganda sparta in tutti i paesi cummunisti.

St'affissu quì saria statu rializatu ind'u 1934 ind'è l'URSS (l'Unioni di i ripublichi sucialisti sovietichi). Di sicuru, saria statu cumandatu da u partitu unicu, cumunistu, incù u scopu, cum'è pà tutti sti maghjini, di mantena ind'a menti di u populu un rispettu pà ciò chì hè stata cumpia pà eddu è da pà eddu. Sopratuttu ci hè dinò u scopu di mantena a vinirazioni di u capu di u statu, Stalin.

Annantu à a maghjina vidimu insù à manu manca u primu capu di statu di l'URSS, Lenin, chì veni sempri glorificatu oghji cù milliai di personi chì sfilani davanti à a so tomba annant'à a piazza rossa di Mosca. Lenin, da a manu manca, ci insegna a bandera di u paesi cù u marteddu è a falci (chì dipinghjini u travagliu di u populu) è dinò i spichi di granu è d'alloru in forma di curonna, è u soli (chì raprisentani u risultatu in stu mondu cumunistu).

Si pò pinsà dinò ch'eddu ci insegna, Lenin, l'avvene di u putere industriali è militaru di l'URSS chì sò figurati sott'à a bandera è daretu à Stalin. In ogni casu, fighjulendu st'affissu, capimu ampiamenti u rollu di Stalin ind'a cusidetta riescita è u putere di stu paesi cumunistu. Si vedeni àrgani tamanti ch'è supraneghani filarati di fabbrichi cù camini alti è fumichendi. Ci sò l'aviò ind'u celu è ci hè dinò un matrali. Hè una manera di raprisentà u sviluppu è i prugressi compii pà via di a gistioni di Stalin.

Sottu à Stalin si vede una massa di ghjenti, intusiasta è appassiunata, cù i so banderi alzati versu à u guidu.

I scritti sò in russiu ma si pò pinsà ch'eddi incuraghjiscinu u lettore à vinirà sempri di più u guidu di u paesi è ch'eddi incitani u populu à fà sempri più sforzi (è sacrifizi) pà a nazioni.

Affissi cusì ci n'era in ogni locu : in iscola, ind'a fabbrica, ind'u scagnu, annant'à a strada, ecc. è sta prupaganda cuntribuiva à fà crede à u populu ch'eddu campava ind'u paesi più felici di u mondu.