Scritti d'una studienti di lingua corsa

L'ultimu rumanzu ch'aghju lettu era Nemesis d'Agatha Christie. A radiu BBC avia passatu dui o trè sittimani fà un strattu è, cum'è di solitu cù Agatha Christie, aviu a brama di cunnoscia a fini di a storia. L'aghju cumpratu annant'à u kindle.

Un omu riccu, cunnisciutu pocu pocu da Miss Marple è mortu da un mesi, s'era accunciatu cù u nutariu di fà li una lascita di 20.000 libri, una furtuna ind'è l'anni sittanta. C'era una cundizioni ma senza nemanc'una struzzioni. Li tuccava à piglià un carru cù altri turisti pà visità casteddi è orti nutevuli.

Di sicura, edda hà capitu chì l'indizii aviani da prisintà si pocu à pocu caminendu cù l'altri turisti. Li bastaria à ricunnoscia li pà risolva l'enigma. Dopu à una stonda li hè diventatu chjaru chì st'enigma era di stabiliscia a verita annant'à a morti d'una ghjovana. U fiddolu di l'omu riccu, un furdanu cù chì u babbu era in fretu, era dighjà da deci anni in prighjoni pà st'umicidiu. Malgradu l'ustilità trà i dui omini, u babbu avia vulsutu fà schjattà a verità d'una manera o l'altra.

Miss Marple t'hà a so manera di fà. Hè un'anzianetta, faci nicia d'ùn essa micca cumplittamenti in sè. A ghjenti chjachjareghja cun'edda senza fà capu di ciò ch'eddi contani.

Riflessioni annant'à u parcorsu di a storia da a parti di Miss Marple ùn ci hè micca. I pulizzeri di Scotland Yard a trovani spavintosa, a diceni à tempu cusì dolci è cusì chjuccuta.

U fiddolu, libaratu da a so prighjò, ùn a li faci micca à ringrazià à Miss Marple ma edda cunnosci abbastanza a natura umana pà capì a so difficultà.

I dui nuttarii pensani à u nomi di Nemesis, a dea di u castigu, datu à Miss Marple da l'omu riccu. Ramintendu si di a so voglia di Miss Marple di piglià i soldi pà spendi li tutti, si diceni chì 'ssu nomi saria statu una burla.

Miss Marple, pà contu soiu, si pò pinsà ch'edda rispichjessi annant'à tutti i storii d'amori, di ghjilusia è di viulenza di u so circondu. A natura umana suviteghja una certa logica. Basta à tena a menti 'ssa logica pà chjappà a chjavi d'una storia chì pari essa incapiscitoghja. Quissa hè ciò ch'edda faci sempri, rumanzu dopu à rumanzu.