Accolta Altri scritti
(Lasceti u topu annantu à a fotò pà vede u titulu.)
Scritti d'una studienti di lingua corsa
Nuvembri 2018
U CASABIANCA
U Casabianca era un sottumarinu di a marina francesa à l'epica di a seconda guerra mundiali. Si truvava in Tulò à a fine di u 1942 quand'edd'hè ghjuntu l'ordine à i navi francesi d'inviassi pà u fondu pà impedisce ch'eddi siani pigliati da l'alimani arrivati da pocu ind'u mezziornu di a Francia. Unipochi di sottumarini anu presu u risicu di scappà, malgradu i cateni stesi sottu à l'acqua, è sò pussuti ghjunghja in Algeria induva si sò messi à u sirviziu di i francesi libari.
Un mesi dopu, u Casabianca hà avutu a missione di stabilisce a cummunicazioni cù i corsi, chì l'isula era stata accupata da i taliani un mesi nanzi è cuntatti incù l'alliati ùn c'erani più.
U capitanu Lherminier annantu à u Casabianca avia previstu di sbarcà una piccula squadra d'omini ind'u golfu di Chjuni vicinu à Carghjese. In tempu di guerra ùn si pò micca ghjunghja à l'ispinsata, musciendusi à tutti. Si sò parmessi di fighjulà un attimu attraversu à u periscopiu, anu vistu una torra ghjinuvesi o diu è si sò ditti : semu bè ind'u golfu di Chjuni, aspittaremu finu à mizzanotti eppò sbarcheremu i nosci omini. Hè ciò chì fu fatta ed hè solu dopu à a guerra chì u capitanu Lherminier hà sapiutu ch'eddi si fussini sbagliati è ch'eddi erani ghjunti in u golfu di Topiti. Anc'assai chì ind'u golfu di Chjuni c'era un campamentu di 1500 suldati taliani ch'avariani fattu un'accolta pocu amichevuli.
Sbarcata, a squadra di 3 omi cù una radiò hè cuddata attraversu à a macchja pà ghjunghja in Revinda induva u sgiò preti li hà messu in cuntattu cù omi di a resistenza.
Tra 'ssa prima missioni è l'iniziu di sittembri di u 1943 u Casabianca hè ghjuntu 7 volti quì in Corsica à purtà omi, armi è munizioni. L'ultima volta cù 100 suldati chì anu participatu à i battagli pà a libarazioni di a Corsica contr'à l'alimani chì circavanu à ghjunghja in Bastia pà imbarcassi pà l'Italia.
Oghji, a turetta di 'ssu sottomarinu sta vicinu à u portu di Bastia in mimoria di a so storia è di i so marinari. Unipochi d'anni era stata, più o menu piattata, annantu à una terrazza di u museu di Bastia prima d'essa stallata annantu à a piazza Saint Nicolas induva tutt'ognunu a pò veda avà è pinsà un mumentu à 'ssi ghjorni neri di a guerra.
U nomi Casabianca hè statu datu parechji volti à una nave di a marina francesa. L'urighjina di 'ssu nomi veni da Luce de Casabianca, babbu d'un ziteddu di 12-13 anni, imbarcatu cum'è muzzu annantu à u bateddu di u babbu, L'Orient. A famiglia era di sterpa casinchesi.
L'Orient hà participatu à a battaglia d'Aboukir. L'amiragliu avaria ricivutu l'ordine da Napuliò, una volta sbarcata l'armata, d'andà à mettesi ind'un altru locu à l'aggrottu ciò ch'eddu ùn hà micca fattu. L'inglesi l'ani trova 'ssa flotta francesa è in pocu tempu l'ani quasgi stirpata. Prima di a battaglia, u capitanu Casabianca avia cumandatu à u so fiddolu d'ùn tralascià u batteddu cà incù u so ordini ma, pà disgrazia, u babbu hè statu tombu mentri a battaglia è, quand'edd'hè ghjuntu u mumentu d'abbandunà a navi incù l'altri marinari sopravvissuti, u babbu ùn pudia più dà l'ordine à u fiddolu. Cusì u ziteddu hè mortu annantu à u bateddu chì si ciuttava sotto à l'acqua.
Pochi anni dopu, ind'u 1826, una pueta inglesa hà scrittu una puesia annant'à sta storia. A puesia in Inghilterra, hè tracunisciuta, soprattuttu i primi dui strofi:
"The boy stood on the burning deck,
Whence all but he had fled... "
U ziteddu, drittu annant'à u ponti in fiara,
Mentri chì l'altri s'erani fughjiti...
... ma senza sapè qualessa era a storia di 'ssu ziteddu neanchi u cuntestu.
Ne parlavu sempri cù i turisti inglesi passendu pà 'ssi lochi è c'era aspessu qualchissia à piglià a seguita di a puesia chì pudeti truvà quì : The Boy Stood on the Burning Deck, Felicia Hemans
S'è vò truveti sbagli in stu testu ci vole à .